Populu sè

Populu sè
Un cecu in a funa
T’avvinghji l’ohimè
È a to malfurtuna
Ghjimbatu accunsenti
Hè svanitu u curaghju è u stintu valenti
S’imponi u pridaghju è nimu ùn dici nienti.

Isula sè
Tocca da u bisestu
Trà l’essa è l’avè
Vinci u disunestu
Eppo` u traditori
Arrubbani l’anziani è furani u signori
À baccu si ni vani tutti li to valori

Populu sè
Spruvistu di ghjustizia
Senza mancu un parè
Ti stirpa a numicizia
Scoddu à a malavìa
Hai tuttu pà campà in paci è armunìa
Ma ti lachi accampà da ugni franasìa

Isula sè
Ciò ch’ùn mireti d’essa
Ùn avarè mai bè
Curcia è suttumessa
À una sorti mischina
Ma un ghjornu ghjunghjarè à spizzà a ruvina
E torna vultarè a Corsica righjina