Per tè fratellu

Eramu à qualchi passi di lu 99 :
À a veghja di Natale duve pace si spera
Per tutt’ognunu à u longu di’ssa dolce sera
Quandu a sorte maladetta, a sorte nera
Hà rapitu un figliolu à la so terra,
Tuchendu una famiglia sana à lu core ;
Sciuttendu Babbu, Madre, Fratelli, Donna in lu dulore…

Hè per tè ; ò amicu caru chè no cantemu.

Si sente culà i lagni di tanti di to opere :
Urfanele è manduline, chitarre, cetere…
Frutti di tantu travagliu fattu cun ardore.
Quandu trà le to mani, nascia a vita dopu ore è ore
È cusì, ch’ella fuss’in amicizia, o in a to arte,
Schjettu è semplice, sempre prontu à sparte.

Hè per tè, ò Fratellu caru ch’è no cantemu.

Eramu à a veghja di Natale quandu hai cambiatu mondu
Ma di tà, ci ferma lu ricordu più prisente, più tondu,
Ed’avà cula insù nantu’sse pianure suprane
À sò chì ùn mancare da fà strumenti strani
Per accumpagnà u cantu serenu di l’anghjuli.
Sentu intrunà i so voci dà quì à l’alti celi…

Hè per tè, caru Patricu chè no cantemu.

Antone Crescenzi
Vaghjime