Passi

Piglià un pugnu di terra
cun radiche intrecciate
l’odore di a serra
è un fiore sbucciatu

Piglià a petricella
di u chjassu frustatu
una di u casellu
di li tempi straziati

Mette tuttu ind’un saccu
cù lu pocu ch’o aghju
è mettemi in affaccu
per fà lu mo viaghju

Piglià una puesia
chì si fece canzona
l’arietta di l’umbria
mez’à i sulleoni

Piglià ciò ch’eo sò
di li ghjorni di festa
chì per scopre l’altrò
ùn si offre timpesta

Mette tuttu ind’un saccu
cù lu pocu ch’o aghju
è mettemi in affaccu
per fà lu mo viaghju

Piglià u gustu amaru
di a mo vechja storia
truveraghj’u mo paru
ch’ùn cunnobbi vittoria

È chì m’amparerà
da li so lochi à ellu
cumu chì trapassà
è fà li ghjorni belli

Eppo entr’in amore
di l’umana sustenza
chì sparte più ch’è l’oru
quandu sparghje sperenza

è saziu d’ogni cena
è stanciatu d’ognunu
vultà à core pienu
inde u mo cumunu

Mette tuttu ind’un saccu
cù lu pocu ch’o aghju
è mettemi in affaccu
per fà lu mo viaghju

Patrick Croce / Baptiste Capai