Parulle parlate

Parulle incantate di a zitellina
Quant’è vo tricate à dì a matina
Voi cusì calle di latte à e labbre
Parulle incantate parlate parlate

Parulle di fuga di i primi amori
Quant’è vo tricate à batte in li cori
Voi cusì calle di focu à e labbre
Parulle di fuga parlate parlate

Parulle assinnate di pesu è primura
Quant’è vo tricate à piglià versura
Voi ch’un vulete più strade sviate
Parulle assinate parlate parlate

Parulle di vita d’amore è di pace
Di mondu più bellu cum’ellu si face
S’è vo site vive da chè vi piattate
Tenite parulla parlate parlate

G.T. Rocchi \ F. Travaglini