Paisaghji

Mi frisgianu a memoria
Issi capelli riccamati
Ochji calisgine è storia
Pè isse strade è lochi amati

Sopr’à l’acqua d’istatina
A to faccia di nunziata
Collu d’acula marina
Cù la pelle basirgata

Labre d’uva malvasia
Cum’è duie ale accuppiate
Fronte spechju è puesia
Di settembre vi n’andate

Chjar di luna nustalgia
Cù li pianti di la fata
Bocca toia via via
Lingua è parulla fidata

E bracce chjama luntana
Spinu d’alba è di serenu
Dinochje di la sulana
Pochju chetu è tempu pienu

Cù la so stete liata
E to mani à lu scupertu
Focu è fola sunniata
Di e to ghjambe à libru apertu

U to corpu muscatellu
Pianu pianu rispiratu
Nant’à l’onde lu battellu
Di u ricordu prufumatu

Un billicu nidicale
Sessu ventu inzuccheratu
In pettu nidu è piuvate
Un cor d’acellu sfiatatu.

Ghjacumu Fusina \ Ghjuvanpaullu Poletti
Petru Guelfucci