Oriu

Vardianu di l’alti cristi
Da u bughju di a storia,
A to petra hè mimoria
Chì à u tempu risisti.

Furtezza di l’antinnati
Pastori è paisani,
Ch’alzonu da li so mani
I to cantona zuccati.

Orii tisori nustrali
Piatti trà machja é fiori,
Seti l’arcani dimori
Ch’unorani u pasciali.

Agrottu pà u banditu
È scappaticci innamurati,
Risistenti ammachjati
À riparu in u granitu.

Vistica d’un altra ità
Da i mea assistatu,
In silenziu stantaratu
Veghji quì pà l’eternità.

Orii tisori nustrali
Piatti trà machja é fiori,
Seti l’arcani dimori
Ch’unorani u pasciali.