1

Nimu ti tocchi

À l’affaccà di u ghjornu nantu à l’onda cristallina
Vicu splenda u cuntornu di ugni verdi cullina,
In issi loca so crisciutu trà u muchju è l’alivu
È ùn possu firmà mutu impittendu issa ruvina.

Nimu tocchi issu pasciali chì s’avvia in libartà
È firmò sin’ad avali un tisoru da tramandà.

Ugni sponda quì s’acquista
è s’avvinghji d’un accintu
Pà inquatrà una vista senza mai essa in drintu,
Ciò chì era salvaticumu è natura rispittata
Oghji si ni và in fumu tempu à l’anticu stintu.

Nimu tocchi issu pasciali d’armunia à risparà
Un golfu senza uguali chì u soldu voli guastà.

A limosina frustera à mè ùn mi pò pratenda
So d’una cultura fiera chì si sà sempri difenda
In faccia à issi scumpienti ùn mi ni staraghju zittu
Chì a tarra ‘lla me ghjenti ùn sarà mai à venda.

Nimu tocchi issu pasciali di magia è binistà
Un riami naturali chì cussì sempri divi stà !
cussì sempri divi stà ! cussì sempri divi stà !
cussì sempri divi stà ! È sempri sarà !

Svegliu d’Isula