Mille cori

Cantu fattu di sole
Purterà benesta
Ci cunterà isse fole
D’amore è Liberta
Li so raghji seranu
Funtana d’amicizia
Ch’in ogni core umanu
Si svarserà in divizia

Cantu fattu di luna
Purtera la dulcezza
Ci purghjerà furtuna
Di a so luce carezza
A so bianca magia
Derà sonnii d’argentu
È spazzerà a pazzia
Cum’è pula à lu ventu

Sò tante voce è cori à intriccià
Un abbracciu, una spartera
Omi di quì, d’altrò tutti à cantà
L’umanità cusì fiera

Mille ghitarre ribombanu avà
A u ritimu di e sperenze
Sò mille voce è cori à suminà
È à schjari le cuscenze

Cantu fattu di stelle
Musterà lu caminu
Di le so riturnelle
U so versu Divinu
U so rime seranu
Luce da suvità
Per l’omu un fiatu, un granu
Un avvene à invintà

Sò tante voce è cori à intriccià
Un abbracciu, una spartera
Omi di quì, d’altrò tutti à cantà
L’umanità cusi fierà

Mille ghitarre ribombanu avà
A u ritimu di e sperenze
Sò mille voce è cori à suminà
È à schjarì le cuscenze

Parolle è musica Federicu Poggi
Voce ventu