Mez’a a sti canti

Fermerà qui spargugliata
A passione mez’a sti canti
E cun ella à fiancu vicinu
I sonni vechji di l’amanti.

Fermerà qui nant’à i passi di memoria
Duve no ghjunghjimu a sunà
Cume l’ultime muntagne da scopre
D’un viaghju di sunnià.

Sai, a ste porte emu pichjatu digià
Ch’ellu s’aprenu i so cori
Tantu tempu emu lasciatu passà
Ma stu fiatu un vole more,
Un vole more.

In cima si sente l’armunia
D’eri è dumane abracciati
Quande tu tessi in cima di puesia
U filu novu inventatu.

Sai, a ste porte emu pichjatu digià
Ch’ellu s’aprenu i so cori
Tantu tempu emu lasciatu passà
Ma stu fiatu un vole more,
Un vole more.

Giramondu.