Messa di Suffraghju

In ‘ssa pianura assiccata
Scurticata da lu ventu
U tempu a s’hè purtata
A mimoria di lu pientu

Da unicu tistimoniu
Ch’è qui piigoni a schiena
Ferma solu lu sognu
In bocca à lu dimoniu
Pà li famigli in pena

Ed in ogni paisolu
Prigaia la so ghjenti
E s’è Diu s’è Diu ci senti
Ch’eddu pianti li pienti
Ch’eddu togli lu dolu.

Fiura di i cannoni
Aia spaccatu i tarri
Ghjimpienduni i tafoni
Ad ossi, sangui è carri

Facia à infrugna infrugna
Lachendu bretti è soli
Com’acu senza cruna
In un pratu senza luna
Issi cori senza soli

Ed in ogni paisolu
Prigaia la so ghjenti
E s’è Diu s’è Diu ci senti
Ch’eddu pianti li pienti
Ch’eddu togli lu dolu.

A qual sarani andati
I pinseri a prighera
D’issi corpi cutrati
A ‘ssa terra mischiati
Chi soia mancu ùn era

Piglioni u so licenziu
Tinendusi in ‘ss’infernu
Com’è fasciu u silenziu
Com’è nanna l’eternu

Ed in ogni paisolu
Prigaia la so ghjenti
E s’è Diu s’è Diu ci senti
Ch’eddu pianti li pienti
Ch’eddu togli lu dolu

E s’è Diu s’è Diu ci senti
Ch’eddu pianti li pienti
Ch’eddu togli lu dolu