L’usina di Canari
E gallerie prufonde, còrciu hà tribbulatu
Culpia furibonde in stu tigliu sbrusgiulatu
Culpia sangue è pulmoni, pòvari disgraziati
Parechji è parechjoni, sò stati vituparati
In muntagna canarese, ci anu alzatu un’usina
Da la cima à lu calzese, chì tamanta a ruvina
In muntagna canarese, ci anu alzatu un’usina…
Parìamu in Caienna, cundannati à morte
Ùn la scrive la penna, ci vulia à tene forte …
Chi trista sorte !
Petra di lu turmentu, à tutti, ai ingannatu
A dì la, scappa u pientu, ghjenta addulurata
In muntagna canarese, ci anu alzatu un’usina
Da la cima à lu calzese, chì tamanta a ruvina
In muntagna canarese, ci anu alzatu un’usina…
Eranu goffe stonde, chi travagliu ingratu
Cascàvanu l’omoni, velenu ghjastatu
L’usina fù sarrata, stu locu hè maladettu
Muntagna scuranata, crepa lu core in pettu …
In muntagna canarese, ci anu alzatu un’usina
Da la cima à lu calzese, chì tamanta a ruvina
In muntagna canarese, ci anu alzatu un’usina…
Ghjuvan Marcellu Tomi / Antonu Marielli