L’ora vinuta

Quandu ne venerà lu ghjornu
D’un ghjucà più à coppiu é nescu
Di sente torna u muscu frescu
Di tutta issa campagna intornu
Quandu serà tempu venulu
D’intreccià torna sogni gioia
È di pensà in anima soia
Ch’ellu venga un ultimu aiutu

Allora tandu senteraghju
È francu cusì d’ogni male
Batte u to core rusulaghju
È tuttu mi serà uguale…

Quandu serà venuta l’ora
D’appacià le notre timpeste
Da li venti di e fureste
Forse si piserà l’aurora
Quandu ne venerà u mumentu
Di basgià li to ochji stelle
È d’alliscià torna a to pelle
Senza bisognu d’accunsentu

Allora tandu senteraghju
È francu cusì d’ogni male
Batte u to core rusulaghju
E tuttu mi serà uguale…

Quandu ne venerà issa stonda
Di stringhjeti torna la manu
D’accarezzatti pianu pianu
Cum’è l’acqua nantu à la sponda
Quandu serà venutu l’asgiu
Di vede torna u to surrisu
Risplende à fiore di u to visu
Prima di rigalammi un basgiu…

Allora tandu senteraghju
È francu cusì d’ogni male
Batte u to core rusulaghju
È tuttu mi serà uguale…

Ghj. Fusina / L. Giacomini