L’Intoscu

N’ùn pudia più campà
Senza medicina alcuna ;
N’ùn pudia più campà
Senza vinu o bierra bruna;
Beve, zingammi è fumà,
Hè troppu strinta la funa.
Aghju lampatu in lu focu
‘Ssi ferri di schjavitù,
Licori di qualchì locu,
Vinu, pastizzu è Cardhù ;
Finitu, più n’ùn mi drogu,
Chì la mio droga sì tù.

Ripigliu:
Vita, vita, vita
Tènemi a giuventù,
Vita, vita, vita,
Un t’inganneraghju più,
Chì la mio droga sì tù.

Di tutte ‘sse pulveracce
Chì mi volianu tumbà,
Di tutte ‘sse pulveracce
M’aghju vulsutu francà ;
Pizziche nant’à e bracce
N’ùn vogliu sente parlà.
D’isse sicarette strane
Cun tutti li so fumi ghjalli,
Iè, ‘sse sicarette strane
N’ùn causeranu più mali ;
N’ùn vogliu più per dumane
Paradisi artificiali.

Vogliu campà la mio sorte
E custruisce un avvè,
Vogliu campà la mio sorte
Senza tutti st’oimmè ;
Tante prumesse di morte,
Falzi sonnii di piacè.
Zitella m’hai seguitatu
Cun lu cusì bellu visu,
Zitella m’hai seguitatu,
Chì m’annacqui d’u to risu ;
Lu t’amore è lu to fiatu
Mi basta per paradisu.