Lamentu di u Mazzeru

Eò so mazzeru
Umbrosu pelegrinu
A notte ceca
Chì dulente caminu !
Fendu in sognu caccighjate
Vecu ghjente cundannate
Cù un’antica magunia
Nù una bèstia à l’agunia.

So di falcina
Lu servu malmatu
In lu paese
Da tutti ghjastimatu
Solu a voce di li fiumi,
Lu stillente è li so lumi,
Li machjoni è  li castagni
Fèrmanu li mio cumpagni.

Ogni trent’unu
Di lugliu hè la Mandraca
Pocu sterminiu,
A chì more, à chì fraca!
In core di la battaglia
Simu tutti à taglia taglia
Cù lu sacru talavellu
Fin’à l’alba o chì macellu !

Scumunicatu
So pè li mio turmenti
Per mè nè croce,
Nè santi sacramenti,
Mi perdonghi lu Signore
Per sècula seculoru,
Ghjurgu  à Diu u core tristu
Ch’ùn aghju inchjudatu à Cristu !

A chi mi sente
Li precu longa strada
Ch’ellu ùn iscontri
A Mumma murtulaghja
D’avanzu à lu sfurtunatu
Ch’una sera aghju ammazzatu,
Dumandu ch’ellu mi scusi
Ma sò guardianu di l’usi !