L’altru Versu

Cantà i ghjorni di sfurtuna
Di tutti i sogni scurdati
Cantà l’avvene chi omu affuna
A l’atomu scatinatu.

Cantà u soldu di i latri
I mulini scarsi di granu
E mandrie viote di e capre
E quelli chi un anu pane.

Cantà u fretu di l’inguernu
Chi culpisce u disgraziatu
A to rima chi vole indernu
Sopra à u to crede imbruttatu.

Cantà i sgio e so ricchezze
A spini povari acquistate
I ghjorni senza carezze
Di i ciucci abbandunati.

Cantà i letti senz’amore
E famiglie à i quattru venti
I mazzuli di i fiori
Chi nascenu à mezu à i pienti.

Cantà l’odiu chi spicca ghjente
E ti lascia u core nudu
Per circà e so sumente
Nantu à e manse di u suvu.

Cantà u sguardu chi hà da vene
E chi à u toiu inturchjatu
Ferà vultà in le to vene
L’amore di un tempu andatu.