L’Abissu

Ci n’hè tanti chi preganu
Eppo in lu silenziu chi soffrenu
Ghjimbati annant’à u sperà
Soli incù le so voce schiette
Spazzendu l’ombra di e notte.

Ci n’hè tanti chi oddianu
Per vindicà le so offese
Sbagliendusi di cantu
Chjosi cum’è a notte
E a vita mischina Bis

Ci n’hè tanti chi fughjenu
U capu di paura gonfiu
Disertu è spalancatu
A tutte l’angunie
Abbughjatu di sè.

Ci n’hè tanti chi correnu
Di certezze infangati
U core abbuginatu
Di memoria spinta
Di i ochji calati. Bis

Ci n’hè tanti chi tombanu
Bocca nera impiccata
Induve và issu sangue
Chi schizzà rossu à voi
Rivolta annantu à neve. Bis

Ci n’hè tanti chi cantanu
Ogni ferita sposti
A l’orizonti scemi
Quandu di troppu inganni
U corpu si stringhje. Bis

Ci n’hè tanti chi morenu
E tante bugie tonde
A e labbre imbuffate
Di quell’omu inchjostru
Chi di miseria campa.

Ci n’hè tanti chi vocanu
Da u male à u bè
Nu e rete petrificate
Di l’immurtale tempu
Di l’immurtale tempu. Bis