In Mediterraniu

In mediterraniu quant’ella era sola
Strada ùn ne sapia chè una
Si cuntava sempre a listessa fola
Era à pienghje sempre sfurtuna

U s’avvene quì era cum’è chjosu
Avvene per elle ùn ci n’era
Locu di silenziu locu di riposu
Messa detta è fatta prighera

E poi una mane addiu galera
S’hè vulsuta arritta in stu mare
Quantu l’hè custata a so discitera
Lacrime di sangue è di sale

Si di a so memoria alza le bandere
Fida à a so storia passata
A dice dinù in ciò ch’ella crede
Più fraterna l’avvicinata

In mediterraniu oghje ùn hè più sola
S’aprenu e strade più belle
Cresce a speranza d’una vita nova
D’isule in cullana è surelle

G.T. Rocchi / Felì Travaglini