I Sgaiuffi

A u tempu di quelle sulane
S’andava a ghjucà nant’a piè’
Di tutte ste cose luntane
Un mi n’arricordu più bè
Mà ci hè in stu ritrattu stancu
Un attimu d’eternità
Ci vecu i sgaiuffi di a banda
Di a piazza Santu Niculà

Ci vecu Alesiu, Paulu, Andria
Ci vecu Luigi è Dumè
Ghjuvan- Michele, Maria-Cristina
Vicinu à tè si vede à mè

D’estate si ghjucava in portu
A macagna di u cumpà
U sumere manghjà l’uva
È scappa scappa sè tu ùn ci voli stà
A capu avanti, botte è stuppinu
Per seguitati da u cumpà
Trà mezzu a sciuma e calate
Un si piantava di scaccannà

Ci vecu Alesiu, Paulu, Andria
Ci vecu Luigi è Dumè
Ghjuvan- Michele, Maria-Cristina
Vicinu à tè si vede à mè

In stacca ùn ci era una baiocca
Mai un bigliettu di sinema
Mà ci era a l’intrata a u scapochju
S’alta manera di pacà
Nanta u nostru tupezzu lisciu
U scapochju duvia chjuccà
A stu sonu di falsa stecca
In paradisu pudiamu intrà

A u tempu di quelle sulane
S’andava a ghjucà nant’a piè’
Di tutte ste cose luntane
Un mi n’arricordu più bè
Cuntemplendu u rittratu santu
Eò mi ne ritornu quallà
A mezz’a i sgaiuffi di a banda
Di a piazza Santu Niculà…

Rivecu Alesiu, Paulu, Andria
Rivecu Luigi è Dumè
Ghjuvan- Michele, Maria Cristina
Sò tutti quì in giru a mè !