Giuvanelli

Voi site li giuvanelli di la Corsica d’avà
In stu mondu di suffuria, ci vole à pudè avanzà
Quandu la vita vi muca, bisogna à andà più in dà
Cù la ciarla, boccarisa, l’angoscia si po scaccià. Bis

O la mio giuvanuttona, tù, a ti face valè
Si la fiera cavaliera cù maestria è arte
E la musica ti garba, è ti piace à cantichjà
U quatrigliu, la scuttiscia sò tutti boni à ballà. Bis

O lu mio giuvanuttone, à tè, ti piace à sunà
Pivana è po viulinu, quellu u sai fà trincà
La paghjella, lu terzettu, u lamentu, u madrigale,
Tù cunnosci tanti versi, campà hè per tè cantà. Bis

E l’amore chi vi unisce, à voi, vi face sperà,
In un avvene più lindu, duve tuttu cambierà
Averete li figlioli, elli feranu da bè
Cum’è avà fate voi, cun talentu è cun piacè. Bis