Ghjustizia è verità

Hè mortu un patriottu
Uccisu à tradimentu
Da una manu infama

Chi mai si ne pente…
Hè mortu à l’abbrucata
D’una vita ribella
Innalzendu la sempre
A soia la bandera.

À chì l’hà cundannatu,
Li ne face rimbeccu
U populu culpitu
Da tamanta saetta.

Indegna hè la ghjustizia
S’ella hè tagliata à fette
Indegna hè la so ghjente
Mute le so cuscenze.

Ma e spere di l’omu
Un si ponu tumbà
Una chjama ribomba
Ghiustizia è verità!

A terra l’aspettava
In li so panni scuri
U ribombu di u cantu
S’he spartu in ogni pieve
Purghjendu lu so nome
Sopr’ à l’eterna stesa
Nantu à e cime altiere
Da chì u ventu palesi.

Hè mortu un patriottu
In sta prigiò francese
L’anu toltu ogni drittu
Dopu à tamante offese
Culpitu ogni parè
Privu d’umanità
Ma d’una mente sciolta
Nasce a libertà..

Chì e spere di l’omu
Un si ponu tumbà
Una chjama ribomba
Ghjustizia è verità.

Patrizia Gattaceca .