Di sole è di sale

Vegu in celu a stantara di l’acula
Saltu di pesciu, acquazzona piccula
Cantu è ricantu di la mo mimoria
Di sole è di sale hé a nostra storia.

Tengu sempre in cuncenza sta cuccagna
Chi ci purtava tempu di bavagna
Sottu à tante stelle, in balia di l’onde
U mare ci cuncediva qualche stonde

Vela bianca ingufiata à grecale
Si pigliava à granlarga dopu u fanale
A calà l’ustinara è u nassone
Pe empie panere, stuvigli e curbone

Acquazzona forte à forza di remu
Si chjamava l’aiutu di san Teramu
Ch’ellu ci porta à l’agrottu in Calvi
Cù la barcella è l’équipaghju salvi

Vegu tante nave, vestute d’eternu
Burdighjendu nanta u mare d’inguernu
Preziosi ricordi di la mo ghjuventù
Vi chjamu,cumu ci chjamava lu ventu.

Jean-Marcel Vuillamier / Compositeur : Ange-Dominique Giovannetti