Da L’Altru Latu Di U Sonniu

Nant’u maròsulu d’i venti,
Vers’à qualchì sponda celesta,
Viaghji à fianc’à i currenti,
Chì la to casa hè di timpesta,
E l’aria frisgia le to piume
Leggera quante fior’ di sciume.

Ripigliu:
Jonathan, àpremi le strade
Anc’eiu seraghju testimoniu
Di e meraviglie immaculate
Da l’altru latu di u sonniu.

Quì lu turchinu ti circonda,
Hè fatta d’acqua la to Terra ;
Meravigliosa hè la to ronda
Trà di pianura, mare è serra,
Di l’alte furie, u tempurale
Ùn ti puderà rompe l’ale.

T’aghju fighjatu per sti mumenti,
In lu to reame d’alture,
Li nostri mondi sò sfarenti,
Lu meiu hè fattu di scritture,
Ma sempre in core ci fermerà
Stessa a sete di libertà.