1

Core Vivu

Cume un battellu chì s’affonda
Sbattutu da lu marosu
U mè core in la ronda
Di l’ore cerca riposu
Cumè un chjosu insalvatighjitu
Ch’ùn cunnosce più rustaghja
U mè core innumighjitu
Sparisce sott’a lanaghja.

U mè core terra sfruttata
Senza à t’acquatà hè siccatu
U ventu scemu di a spiccata
Corre in lu mio sangue malatu.

Cumè una leccia in la furesta
Aghjumpatu sott’à lu ventu
U mè core in la timpesta
Di li guai è lu turmentu
Cumè un prigiuneru languente
Volta in la so pagliaccia
U mè core fruttu ardente
S’hè persu in la to fumaccia.

U mè core terra sfruttata
Senza à t’acquatà hè siccatu
U ventu scemu di a spiccata
Corre in lu mio sangue malatu.

Cumè la si tronca l’ardetta
Sott’u passu furesteru
U mè core toccu di a saetta
Sbrighjuleghja d’addisperu
Cumè una barca in lu mare
Chì lotta per truvà portu
U mè core in l’acqua amare
Di i to ochji si nè mortu.

U mè core terra sfruttata
Senza à t’acquatà hè siccatu
U ventu scemu di a spiccata
Corre in lu mio sangue malatu.