Celente

Da li tempi passatoni
L’antenati èranu avvezzi
Ad alzà l’ochji à le stelle
E visticà segni strani

Picuraghju è capraghjolu
Sicantinu è insulcadore
Lighjianu u libru celestu
Da l’attrachju à i primu albore

Par piacè è pà bisognu
Ne guardavanu u Celente
E u contu di Salamonu
L’avianu tutti à mente

A Funaceca di i Stelli
Sempre l’anu suvitata
Pà impiaghjera è muntagnera
Qualvoglia sia accimata

Celente inghjermaghjolu
Celente, le to lege arcane
Fàcenu girà lu mondu
E la vita hè in le to mane

Cunniscianu e Impernate
Mutaghjole è Stellulella
Lunaria, Patta e Calende
Lucicore è Cinquinella

Di notte sapianu l’ora
Cù la stella Tramuntana
U postu di li Signali
Verguli, Caru è Diana

O beata quelle stonde
Ghjente è celu in armunia
E lu Corsu un li so fatti
Rispettu in la natura avia

Ma li sèculi so scorsi
Cum’è làcrime di luna
E li strolaghi so spenti
Li sicreti so in bruma

Celente inghjermaghjolu
Celente, le to lege arcane
Fàcenu girà lu mondu
E la vita hè in le to mane