Canti

Di tanti canti fogli
U troppu accoltu, scioddi menti
Porta à la fruntiera d’Urienti
Ad alta boci, à l’impinsata
A musica bocimischiata
À l’ochji di u soli.

Di tanti canti funa
U troppu avè tinutu caru
Ciò chì à tè mi facia paru
Porta à lu sguardu di un ziteddu
U me sonniu brusgia ciarbeddu
À l’ochji di a luna.

Tanti canti sintenza
Da tessa a sempiterna tela
À lu ventu imbuffa vela
Arrecani à la marina
A cundanna faccia mischina
À l’ochji di i to sensa.

Di tanti canti sciolti
Intricci di foli è magia
Atti di vita, ùn la sapia
Ferma un frisciu à mezu à u ventu
À quandu risa, à quandu pientu
À l’ochji di a notti.

Di tanti canti novi
Chì ti sò quant’è u tisoru
À l’ità tempu d’acqua è d’oru
Nè capu, nè codda, nè versu
N’avemu fattu un universu
À l’ochji di qual’voli.

È tanti canti focu
Vani à brusgià ardenti brusta
L’ochji neru di a cosa ghjusta
U dubbitu ch’idda mi deti
S’iddu ferma, nimu ùn lu credi
À l’ochji d’issu locu.

Di tanti canti danni
U troppu di la to raghjoni
Ciambuttarà tra i staghjoni
A casa bianca di a leghji
Pà u mali ch’idda ci feci
À l’ochji lindumani.

Ceccè Lanfranchi / Jean-Marc  Lanfranchi