Caldamoni

U sole pichja, ammazza l’ombre
È nimu parla, nunda si sente
L’ora hè ghjacciata cum’un frombu
D’una pistola ch’hà digià tombu.

È mi carezza issu silenziu
È brusgia pianu è piengu assai
È ci carezza à noi issu ventu
Ch’ùn pò parlà ma scrive u tempu

A casa hè viota, riceve l’ombra
Elle ch’ùn volenu più esse fora
Canta è rispira u mio mondu
Di pula grisgia eppo di nunda.

È mi carezza issu silenziu
È brusgia pianu è piengu assai
È ci carezza à noi issu ventu
Ch’ùn pò parlà ma scrive u tempu.

Finestre chjose è ghjelusie
Sò quì per purtà fantasia
À una stanza senza carezza
Lenzoli fatti da l’amarezza.

È ci carezza à noi issu ventu
U soffiu di l’altu quassù
Diu u ci manda cusì viulente
Per fà pensà à l’aldilà.

Diana Saliceti / B.Amidei