1

Anu lasciatu

Anu chjosu e scole u vechju campanile
A nepita hè crisciuta à cantu à u casgile
Anu lasciatu un fiore
Pè u mese d’aprile

Anu chjosu e case quand’elli sò partuti
Ma u sole hè vultatu mezu à i caracuti
Sò firmati l’amori
In li paesi muti

Abbandunate l’orte è i prati à vaccheghju
Ci corre una funtana è canta à trimuleghju
Sò firmati i strazii
À cantu à u cunceghju

Ci hè un purtone apertu di castagnu tarlatu
È nantu à u scalellu trentanove stampatu
Anu lasciatu l’ore
Di u tempu passatu

Da sottu à una croce truvarete una scritta
I nomi sò zuccati nantu à una petra arritta
Anu lasciatu un pientu
Una lacrima zitta

Nantu à un muraglione anu postu in turchinu
Corsica Nazione di pettu à lu destinu
S’anu lasciatu un passu
À mezu à lu caminu

S’anu lasciatu un passu
Era l’ultimu fiatu
S’anu lasciatu un passu
U sole era chjinatu

S’anu lasciatu un passu
Chì ùn hè ancu vultatu …

GF Bernardini