Affrescu

Stu tribbiu chì un ventu hà purtatu luntanu
Sotria di l’omi andati privi di u so ribombu
Figlioli di un matticciu chì una sciabula hà tombu
Cascati in u furore di e mosse chì sanu
Quant’ell’hè dolce è lindu u tempu di e speme.

Una sapara casa duv’è passasti l’anni
À l’anni accatastati da ghjunghje sin’à noi
E’le petre pisate cum’è stelli d’eroi
Da omi à tesse nebbie da omi à parà danni
Una cù l’altri nati in core à noi inseme

E cispre cù l’arcusgi è l’acciaghju murtale
U fiume chì trascina a libertà culpita
I morgani ind’è l’ochji chjosi nantu à vita
E u sole chì more nant’à un vechju sciappale
Da fà pienghje la terra da fà li dì ghjasteme.

L’oramai chì hè di punta à l’aghja nova
Tuttu impastatu à sonnii è à lascite antiche
Quandu si cala u sguardu è vede e vistiche
Di un passatu chì indetta una sotria ritrova
Ingarmigliata tutta à ondere è à gemme.

Marcellu Acquaviva \ Bruno Coulais
A Filetta