Addurmentati

Per stanciati lu to pientu,
In sta notte di tonu è ventu ;
Ti vogliu cuntà figliola,
D’un urfanella quissa fola,
Chì da tutti fù tralasciata
In sena una furesta fatata…
Addurmentati, addurmentati…

Una muvrella li dessi pettu,
Di a so lana ni fece lettu,
Fù un pasturellu à vighjala
È à chjamala fiurella,
Chì di l’affani di u so cori,
Ne sapia guai è culori…
Addurmentati, addurmentati…

Fù la luna cù e stelle,
À fà carezze di mele ;
U sgiò sole li fece abitu,
D’oru è di lume cusgitu,
Ad’annannala fù lu mare,
Cù tutte so onde pare…
Addurmentati, addurmentati…

Di sta zitella cusì pura,
Donna natura pigliò cura ;
Ed’in terra à u più prufondu,
Ùn si ne trova in stu mondu.
Chì lu to sognu in un fiore
Si svanisca, è sbuccia amore…
Addurmentati, addurmentati…

Antone Crescenzi \ Mighele Tomei
Vaghjime