1

A Tè Surella

Senti u stridu di u chjonchju
Ribumbà trà mez’è fronde
È u rughju sopra l’onde
Di Tavignanu u camonchju
Acqua chieta sbond’i muri
Oghje nè simu sicuri

Ascolta u fiscu stridente
Di l’omu addisperatu
Nant’e sponde splendurente
Ellu cerca l’altu pratu
Quellu chì frischja a notte
Forse chjamerà a morte

Senti ughjulà lu ventu
E l’animali famiti
Què sò voce di spaventu
È anime di rimiti
Streghe maghi surpatore
Cresce lu nostru terrore

Ma ùn’appia timore
Sippii curagios’è fiera
Camina sin’a la sera
Senza teme lu rimore
Di sti lochi di furore
Nè feremu u nostr’albore

Tempu ghjunt’à la casetta
Trinca versu à Bocca piana
Quì ci canta una funtana
E un nè manca filetta
Tandu sarè a mio fata
E per sempr’a mio spusata

Un trema più zitelletta
Manc’ùn pensa à la morte
Un lettinu di filetta
Ci ferà francà a notte
E inseme sparteremu
A passione chi ci move …