A sciappata

Cancaru rughjinosu misurendu a forza di l’omu
Causa di i me guai è suvu di a me stizza
Chì cunduci ogni porta à u lucchettu di u spiritu
Quandu a mani ùn accarezza è u maestru s’arrizza

È à dì la franca è chjara ùn ci mettu ghjirarchia
Cù quiddi chì à Livanti in issi lochi d’Arabia
Piddani i donni à pitrati pratindendu in a ghjustizia
Minà ziteddi pà a so lingua ancu quista hè barbaria

Una sciappata à mezu à a faccia chì ùn mi laca a paci
Chì v’hà intunnatu u ciarbeddu è ancu seccu l’abbaghju
À vo a leva accrianzata à rinigà pà campà.

È puri à sti mal’ distini ùn cuncedu tutti i scusi
Compii i tempi zitiddini pudiani cambià l’usi
Ma sò missi i cunfini ind’è st’animi cunfusi
Cù issa lascita magrantina oghji semu dilusi

S’è i più grandi arburoni nascini di un granaceddu
Vuliami essa sapiintoni com’è vo dapo’ ziteddu
Di li più forti ghjamboni erati i più beddi frutti
In corpu di a Francia pruspera vi seti lacatu u fustu

Eti leccu tutti tandu ni sintimu oghji tutti
Oghji quasgi à sicutera ci tocca à ritruvà suchju
Struiti oghji in a duttrina sempri pratichi in a campagna
Cunfisseti la ancu vo ch’oghji u vosciu cori si lagna

Ancu assa’ chì l’anca torta à u ghjacaru ùn s’addrizza
Eti rispichjatu altru chì un discorsu d’infamia
Maestru s’edda li piaci tinarà a so ignuranza
C’eti salvatu di u peghju a disfatta di a partanza